ޖުވެނައިލް ކޯޓުގެ މަސައްކަތް ޖުވެނައިލް ކޯޓުގެ އާ ޢިމާރާތަށް 25 މާރޗް 2012 ގައި ބަދަލު ކުރައްވައިފިއެވެ. ޖުވެނައިލް ކޯޓު ކުރިން ހިންގަމުން އައީ ފަންހިޔާ ބިލްޑިންގ ގެ 2 ވަނަ ފަންގިފލާގައެވެ. އަލަށް ޖުވެނައިލް ކޯޓުގެ މަސައްކަތް ބަދަލުކުރީ ޖުވެނައިލް ކޯޓުގެ އާ ޢިމާރާތްކަމަށްވާ މ.މާތިލައަށެވެ. ޖުވެނައިލް ކޯޓަށް މިލިބުނު އާޢީމާރާތުގެ ސަބަބުން ކޯޓުގެ މުވައްޒަފުންނަށް މަސައްކަތްކުރުމަށް އެކަށޭނެ މާޙައުލެއް ލިބި، ކޯޓަށް ޙާޟިރުވާ ފަރާތްތަކަށާއި، އެކި ބޭނުންތަކަށް ކޯޓަށް ޙާޟިރުވާ ފަރާތްތަކަށް ވަރަށް ބޮޑެތި ފަސޭހަތަކެއް ވެގެންދާނެކަމަށް ކޯޓުން ދެކެއެވެ.

2012 މާރޗް މަހުގެ 18 - 22 އަށް ބ.އޭދަފުށީގައި ބޭއްވުނު، ޖުވެނައިލް ޖަސްޓިސް ޓްރެއިނިންގ ގައި ޖުވެނައިލް ކޯޓުގެ ފަރާތުން އެ ޓްރެއިނިންގެ ފެސިލިޓޭޓަރުންގެ ގޮތުގައި ބައިވެރިވެ ވަޑައިގެންފިއެވެ.

ކޯޓުތަކުން ކުރަމުންގެންދާ އަމުރުތަކަށް ސަލާމަތީ ބާރުތަކުންނާއި، ތަންފީޒީ ބާރުތަކުން ތަބާނުވުމާއި، ކޯޓުތަކުގެ ޙުރުމަތް ކަނޑަމުންގެންދާތީ، ޖުވެނައިލް ކޯޓުގައި މިއަދު ޝެޑިއުލްކޮށްފައިވާ މައްސަލަތައް ކެންސަލްކޮށްފިއެވެ. އަދި ކުރިއަށް ޝެޑިއުލް ކޮށްފައިވާ މައްސަލަތަކާއިމެދު ޢަމަލުކުރާނެ ގޮތަކާއިބެހޭގޮތުން ކޯޓުން ދަނީ މަޝްވަރާކުރަމުންނެވެ.

މަސްތުވާތަކެތީގެ މައްސަލަތަކުގައި ކުޑަކުދިންގެ މައްޗަށް ދަޢުވާ ކޮށްފައިވާ މިންވަރު 2011 ވަނަ އަހަރު ވަރަށް ބޮޑުތަން އިތުރުވެ، އެ އަހަރު ކޯޓަށް ހުށަހެޅުނު މަސްތުވާތަކެތީގެ މައްސަލަތަކުގެ ޖުމްލަ ޢަދަދު 66 އަށް އަރައިފިއެވެ.