ޗިލްރަންސް އޮމްބަޑްސްޕަރސަންގެ އޮފީހާއި ޔުނިސެފް ގުޅިގެން، މިމަހުގެ 14 އިން 15 އަށް ކްރޮސްރޯޑް މޯލްޑިވްސްގައި ކުރިއަށް ގެންދިޔަ "ޗައިލްޑް ރައިޓްސް ސިމްޕޯޒިއަމް"ގައި ގައި ޖުވެނައިލް ކޯޓުން 2 ބޭފުޅުން ބައިވެރިވެވަޑައިގެންފިއެވެ. ދެ ދުވަހުގެ މުއްދަތަށް ކުރިއަށް ދިޔަ މި ސިމްޕޯޒިއަމްއަކީ، ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނުން ޗިލްރަންސް އޮމްބަޑްސް ޕާސަންގެ އޮފީހަށް ލާޒިމްކުރާ ކަންކަން ތަންފީޒުކުރުމަށް އެ އޮފީހުން ކުރަމުން ގެންދަވާ މަސައްކަތްތަކުގެ ތެރޭގައި ހިމެނޭ، ކުޑަކުދިންނަށް ރައްކާތެރިކަން ކަށަވަރުކޮށްދިނުމުގެ ނިޒާމު ހަރުދަނާކުރުމުގެ ގޮތުން ކަމާގުޅުންހުރި ޢިދާރާތައް ހޭލުންތެރިކުރުވައި، ކުޑަކުދިންގެ ޙައްޤުތައް ރައްކާތެރިކުރުމުގެ ގޮތުން މުއައްސަސާތަކުގެ މެދުގައި އޮންނަންޖެހޭ ގުޅުމާއި ޖަވާބުދާރީވުން ހަރުދަނާކުރުމަށްޓަކައި ބޭއްވުނު ސިމްޕޯޒިއަމްއެކެވެ. އެގޮތުން، މި މަހާސިންތާގެ ތެރެއިން، މުއައްސަސާތަކުގެ މަސައްކަތް ބައްޓަންކުރުމުގައި ކުޑަކުދިންގެ މަޞްލަޙަތަށް އިސްކަންދިނުމުގެ ރޫޙު އާލާކުރުމާއި ގުޅޭގޮތުން މަޢުލޫމާތު ފޯރުކޮށްދީފައިވެއެވެ. މީގެ އިތުރުން މި މަހާސިންތާގައި، ކުޑަކުދިންގެ އަދުލުގެ ޤާނޫނު، ޤާނޫނު ނަންބަރ:19/2019 އަށް ޢަމަލު ކުރަންފެށުމާއެކު އައިސްފައިވާ ބަދަލުތަކާއި، މިހާރުވެސް ކުރިމަތިވަމުންދާ ގޮންޖެހުންތައް ދެނެގަނެ، އެކަންކަން ވީހާވެސް ހަރުދަނާ ގޮތެއްގައި ޙައްލުކޮށް އިޞްލާޙުކުރެވޭނެ ގޮތްތައް ދެނެގަތުމާގުޅޭގޮތުންވެސް ވަނީ މަޝްވަރާ ކުރެވިފައެވެ. ޖުވެނައިލް ކޯޓުގެ ފަރާތުން މި ސިމްޕޯޒިއަމްގައި ބައިވެރިވެވަޑައިގެންނެވީ ލީގަލް އޮފިސަރ އަލްއުސްތާޛާ ޝިނާޒާ މުޙައްމަދުދީދީ އާއި ޕްރޮބޭޝަން އޮފިސަރ އަލްއުތާޛާ މަރްޔަމް ރައުޟާއެވެ.