ޖުވެނައިލް ކޯޓުގައި ކުރިއަށް ގެންދާ ޝަރީޢަތްތަކުގައި އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް ބައިވެރިވުމާ ބެހޭ އުޞޫލު މިއަދު ޢާންމުކޮށްފިއެވެ. މި އުޞޫލަކީ ޖުވެނައިލް ކޯޓުގައި ކުރިޔަށް ގެންދާ ކުޑަކުދިންގެ ޖިނާއީ މައްސަލަތަކުގެ ޝަރީޢަތް ހިންގާއިރު، އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް ޝަރީޢަތް ކުރިއަށް ގެންދިއުމުގެ ޟަރޫރަތެއް އޮތްކަމަށް މައްސަލަބަލާ ފަނޑިޔާރު ނިންމަވައިފިނަމަ، ދައުލަތުގެ މުއައްސަސާތަކުން ކޯޓަށް ޙާޟިރުވާންޖެހޭ ފަރާތްތަކާއި، ދިފާޢީ ވަކީލުންނާއި، ދައުލަތުގެ ވަކީލުން އޯޑިއޯ އަދި ވީޑިއޯ ކޮންފަރެންސް މެދުވެރިކޮށް ޝަރީޢަތްތަކުގައި ބައިވެރިވުމާ ބެހޭ ކަންކަން ބަޔާންކުރާ އުޞޫލެވެ. މިއަދުން ފެށިގެން މި އުޞޫލަށް ޢަމަލުކުރަންވަނީ ފެށިފައެވެ. ޖުވެނައިލް ކޯޓުގައި ކުރިއަށް ގެންދާ ޝަރީޢަތްތަކުގައި އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް ބައިވެރިވުމާ ބެހޭ އުޞޫލު ޖުވެނައިލް ކޯޓު ވެބްސައިޓްގެ ޑައުންލޯޑްސް ޓެބްއިން ޑައުންލޯޑް ކުރެއްވޭނެއެވެ.